Тропарь, глас 8
Якоже бо солнце и луна наготою своею не срамляются, тако и ты, угодниче Христов Василие наг сый, не срамляшеся, восприят бо ризу Адама первозданнаго, юже он ношаше прежде в раи, ты же сию на земли поносил еси; и был еси добрый купец: елико имеяше, вся остави и купи мздою терпения своего село, на немже сокровен безценный Бисер, Христос. Сего ради явися всем грешным образ покаяния и вселися в райскую широту, и, предстоя Христови, не забуди град, в немже обита, и люди, преблаженне, и моли спасти души наша.
КОНДАК, глас 4
Духом Божиим водим, преблаженне Василие, оттрясл еси мирский мятеж и жития треволнения возгнушался еси, и совлекся одеянии тленных и облекся в ризу безстрастия, убежал еси ловления льстиваго миродержца, и был еси странен во твоем языце, и паче земнаго богатства избрав богатство небесное, увязлся еси венцем терпения. И ныне, преблаженне Василие, моли Христа Бога о творящих святую память твою, да зовем ти: радуйся, преблаженне Василие.
ВЕЛИЧАНИЕ
Ублажаем тя, святый блаженный Василие, и чтим святую память твою, ты бо молиши о нас Христа Бога нашего.
Молитва первая
О великий угодниче Христов, истинный друже и верный рабе Всетворца Господа Бога, преблаженне Василие! Услыши ны многогрешныя, ныне вопиющыя к тебе и призывающыя имя твое святое: помилуй ны припадающыя днесь к раце мощей твоих: приими малое наше и недостойное сие моление, умилосердися над убожеством нашим, и молитвами твоими исцели всяк недуг и болезнь души и тела нашего грешнаго, и сподоби ны течение жизни сея невредимо от видимых и невидимых враг безгрешно прейти, и христианскую кончину не-постыдну, мирну, безмятежну, и Небеснаго Царствия наследие получити со всеми святыми во веки веков. Аминь.
Молитва вторая
О блаженная душе, о премудрости исполненный разуме: возсия бо нам светонезаходимое солнце веселия, просвещая Российское царство: от бесов уязвленных исцелитель, паче же и самих бесов прогонитель, слепым прозрение, хромым хождение, сляченным исправление, болящим всем исцеление и здравие: от бед и скорбей избавление, печальным утешение. Аминь.
Молитва третья
О угодниче Христов, преблаженне Василие! Услыши ны, многогрешныя, ныне вопиющия к тебе: помилуй ны, раб Божиих (име-на), и умилосердися над убожеством нашим! и молитвами твоими исцели всяк недуг и болезнь души и тела нашего грешнаго, и сподоби ны течение жизни сея невредимо, от видимых и невидимых враг, и безгрешно прейти, и христианскую кончину непостыдну, мирну, безмятежну, и Небеснаго Царствия наследие получити, со всеми святыми, во веки веков. Аминь.